कोरोणाच्या काळामध्ये एका नवीन सदस्याने आमच्या घरामध्ये जून 2020 मध्ये प्रवेश केला, ती म्हणजे माझी सायकल. त्यात पण गिअरची सायकल. हो नाही करत करत ती आमच्या घरात आली आणि कुतुहालाचा विषय बनली. मग कधी कात्रज घाट तर कधी कधी पानशेत असा प्रवास सुरू झाला. लॉकडाऊनच्या काळात बऱ्याच वेळा आमच्या ऑफिस वाऱ्या सुरू झाल्या. जनता बँकेमध्ये नवरे सर, गायकवाड सर यांचा लांब पल्ल्याचा सायकल प्रवास करणारा ग्रुप आहे हे जाणून होतोच. परंतु ऑफिस ते घर तेवढे पुरे करतोय ते भरपूर झाले, या विचारामुळे अजून तरी कुठेही लांब पल्ल्याच्या सहलीला जाण्याचा विचार नव्हता.
अशातच आमच्या मुख्य कार्यालयाचे ऑक्टोबर नोव्हेंबर च्या आसपास स्थलांतर होणार असे वारे वाहू लागले. याच सुमारास संदीप देशपांडे सरांनी डिसेंबरच्या मध्यावर बेळगाव ते हम्पी सायकल प्रवासाकरीता चल असा आग्रह धरला. एवढी लांब व सलग सायकल कधीच चालवली नव्हती. बरेच आधेवेढे घेऊन होकार कळवला. दररोजच्या थोड्या थोड्या सरावाने धीर यायला लागला. डिसेंबरच्या सुरुवातीस बरीच दुकाने पालथी घालून माझ्या एमटीबी करिता लहान आकाराचा टायर मिळतोय का याची चाचपणी झाली व शोध घेऊन नवीन लहान आकाराचे टायर बसवून घेतले. बाकी सहा जणांकडे हायब्रीड प्रकारातील सायकल होती. माझ्यामुळे इतरांना त्रास नको म्हणून हा खटाटोप करावा लागला. पण त्यानंतर लक्षात आले की विक्रम म्हणजे माझा आत्येभाऊ, त्याच्या मित्राकडे म्हणजेच अनिरुद्ध कडे त्याची एक हायब्रीड सायकल्स पडून आहे. मग काय सर्व धडपड करून एका रात्रीत ही सवत माझ्या पार्किंग मध्ये दाखल झाली.
काही दिवस याच हायब्रीडवर सराव केला आणि याच सायकलने प्रवास करायचा हे नक्की केले. दिनांक 19 ते 25 डिसेंबर 2021 असा एक कच्चा प्लॅन कॅफे गुडलक येथे नक्की झाला. सात जण नक्की होतेच. ट्रॅव्हलर गाडी आणि सात-आठ सायकलचा सेट अशी बांधणी नक्की झाली. नेमके याच दरम्यान म्हेवणीचे 24 डिसेंबरला सोलापूरला लग्न होतं, त्यामुळे तन्वी 13 तारखेलाच सोलापूरला पळाली होती. त्यामुळे निवांत होतो. कुठल्याही दौऱ्याच्या आधी एक decathlon मध्ये फेरी ठरलेली असते. तशीच यावेळी सुद्धा झाली.
आज दि. 18 डिसेंबर, शनिवार असल्याने काही जणांनी पूर्ण दिवस तर काहींनी अर्धी सुट्टी काढली होती. मी सुद्धा बँकेमध्ये थोडे काम बाकी असल्यामुळे ते पूर्ण करून वेळेत घरी आलो. बँकेत जातानाच सकाळी सर्व बॅग आवरून बँकेत गेलो होतो. दुपारी घरी आल्यावर सामानाची बांधा बांध केली आणि सायकल वरूनच सिंहगड रस्त्यावरील संजय सरांच्या घरी पोहोचलो. तिथे सर्व एकत्र येऊन चहा झाला, सर्व सायकलस् व्यवस्थित गाडीमध्ये बांधल्या गेल्या ( संजय सरांनी बॅक अप म्हणून त्यांची एक जादाची सायकल पण सोबत घेतली होती) आणि आम्ही आमच्या पहिल्या मुक्कामाकडे म्हणजेच कोल्हापूर प्रस्थान केले.
वाटेतच कराड येथे ढवळीकर सरांच्या मित्राच्या पंकज हॉटेलमध्ये स्वादिष्ट जेवण केले. तिथेच कराड शाखेतील दोन सेवकांनी आमच्या सर्वांचे पुष्गुच्छ देऊन स्वागत केले.
साधारण शनिवारी रात्री अकरा वाजता आम्ही कोल्हापुरात दाखल झालो. येथे कोल्हापूर शाखेचे शाखा व्यवस्थापक - म्हाकवेकर साहेबांनी बँकेच्या गेस्ट हाऊस मध्ये आमच्यासाठी छान व्यवस्था करून ठेवली होती. उद्या सकाळी बराच मोठा प्रवास असल्याने सगळी आवरा आवर करूनच आम्ही झोपलो
No comments:
Post a Comment